A reunión do Club de lectura do mes de novembro levounos a comentar o libro de "El lenguaje de las fuentes" do autor Gustavo Martín Garzo. En xeral a obra gustou sobre todo polo novedoso enfoque co que trata un dos episodios bíblicos máis coñecidos.
A obra da que falaremos o vindeiro 21 de decembro é a obra de Xabier Quiroga "Coa man esquerda".
Iniciamos este "curso" con moitas ganas, xente nova e novo calendario. Voltamos a reunirnos nun único grupo o último xoves de cada mes. A obra que comentaremos a finais de outubro é El vagón de las mujeres de Anita Nair.
A recta final do trimestre estivo chea de actividades.
Para mostra un botón:
 |
| O 5 de maio estivemos con Iseo a Moura e "A grandeza do pequeno". |
 | |||
| Trémola Teatro presentounos o 19 de maio "A gran aventura dos animais" | . |
 | ||
| O 2 de xuño o Mago Paco deixounos "Unha maxia diferente". |
 |
| Integrantes do club de lectura participaron do roteiro Castelao pola cidade de Pontevedra o sábado 10 de xuño. |
 |
| Ata o último momento tivemos visitas escolares. Foi un pracer pechar cos maiores de infantil do CPR San Fermín. |
 | |||
| Non esquecemos aos máis novos. Charo Pita contou para eles o venres16 de xuño. |
Por suposto non nos olvidamos da última reunión da tempada do club de lectura que como é habitual fíxose tomando uns viños nun local do pobo.
O pasado mes de maio os dous grupos do club de lectura reunímonos para comentar a obra "Os vellos non deben de namorarse" de Alfonso R. Castelao. Para a meirande parte dos integrantes do club foi unha segunda lectura pero, coma sempre, atopamos elementos novos e compartimos puntos de vista diferentes. Coñecemos algo mellor sobre o seu proceso de escritura así como algunha que outra curiosidade ao redor dunha obra tan recoñecida da nosa literatura.
O vindeiro e último libro da tempada é Nus de Manuel Gago.
O vindeiro libro é todo un clásico da literatura galega "Os vellos non deben de namorarse" de Alfonso R. Castelao que dará paso a unha actividade do club de lectura fóra dos muros da biblioteca.
Este pasado mes de marzo nas reunións do club de lectura comentamos o libro Kitchen da autora xaponesa Banana Yoshimoto. A obra caracterízase polo seu intimismo e verosimilitude. Un dos comentarios que máis se repiteu foi o de "historia triste pero fermosa". Tamén falouse das peculiaridades que atopamos na escrita dos autores orientais, dos silencios e por suposto da importancia da cociña neste texto.
A lectura para o mes de abril é Hotel silencio da escritora islandesa Audur Ava Ólafsdóttir.
Nas reunións do club de lectura do mes de febreiro, comentamos o libro de relatos de Charo Pita "Retratos en branco e negro" publicado por Galaxia.
O libro está estruturado en dúas partes; a primeira leva como título "Retratos" e a segunda "En branco e negro"
Pola primeira parte van desfilando personaxes cunhas historias que oscilan entre o fantasmal e o cotiá, entre a fantasía e a verosimilitude, narradas cunha linguaxe precisa e poética. Personaxes e historias se interrelacionan entre si, ás veces de modo contundente e outras só cun trazo, de tal modo que case parece un xogo con quen está ler. Todos os relatos están protagonizados por mulleres de diferentes idades e con distintas motivacións para a vida. Nesta parte imos atopar moitas referencias a elementos da mitoloxía galega, e aos contos clásicos tradicionais.
Na segunda parte destaca o relato "Leopardas" onde dúas mulleres inglesas e de gran calado histórico, a exploradora Mary Henrietta Kingsley e a sufraxista Emily Wilding Davison son as protagonistas.
En xeral, é un libro que gustou pola súa amena lectura e polos fíos que van unindo ás distintas protagonistas. O próximo 17 de marzo virá a autora a presentar esta obra súa e seguro que nos desvelará máis detalles interesantes.
A seguinte lectura é "Kitchen" da xaponesa Banana Yoshimoto.
Arraianos é un conxunto de dez relatos ambientados na Raia, entre Galicia e Portugal, onde o seu autor, Méndez Ferrín, demostra a súa mestría no realismo máxico. Esta foi a lectura escollida polo club de lectura para ser comentada nas reunións de xaneiro. O mundo fantasmal e máxico xunto coa prosa tan persoal como rica, dificultou a comprensión dalgúns dos contos pero outros, aqueles que estaban máis relacionados coa mitoloxía galega, como as meigas ou o mal de ollo, gustaron máis.
En calquera caso, foi unha interesante aventura, a de sumerxirnos no ambiente arraiano, saber máis do Couto Mixto, ou viaxar no tempo, xa que hai contos ambientados na primeira guerra carlista e outros na guerra civil.
Volveremos ao mundo dos contos breves, desta volta con Charo Pita e Retratos en branco e negro, que será comentado nas xuntanzas de febreiro.
Os membros do club de lectura pasamos as festas de Nadal coa lectura que comentaremos en xaneiro.
Desta volta, optamos por un clásico da literatura galega, Arraianos, de Méndez Ferrín.
O pasado mes de novembro tivemos as reunións do club de lectura. A obra comentada foi galardoada co Premio Pulitzer de ficción no ano 2015 "La luz que no puedes ver" do autor Anthony Doerr.
Todos coincidimos que se trata dun libro de fácil lectura, ainda que os saltos temporaris na narración nalgún momento confundían un pouco. A historia transcorre durante a Segunda Guerra Mundial e cóntanos a vida de dous rapaces que se cruzan nun momento dado así como dun amplo abano de personaxes secundarios moi interesantes. A historia está ben tecida e os diálogos e as descripcións trasládannos a esa época. Coñecemos da importancia da radio como elemento de propaganda nese conflicto bélico así como das accións de saqueo dos tesouros culturais por parte dos invasores. A obra gustou, a uns moito e a outros menos pero coma sempre dou para unha conversa moi grata.
A próxima lectura a comentar sera "El largo adiós" de Raymond Chandler.
O día 30 de xullo tivo lugar a última reunión do club de lectura da biblioteca desta tempada 2021-2022 e foi un encontro moi especial xa que había moito tempo que non nos xuntabamos tanto os do grupo do mércores como o do xoves e para celebralo a reunión tivo lugar fóra da biblio onde tivemos ocasión de brindar polo noso querido club.
A lectura da que falamos foi Una temporada para silbar de Ivan Doig e publicada por Libros del Asteroide. É unha novela ambientada no rural de Montana a principios do século XX, onde unha familia formada por un viúvo e os seus tres fillos pequenos deciden recurrir aos servizos dunha ama de chaves, Rose, que chegará acompañada polo seu irmán Morris quen acabará exercendo de mestre nunha escola unitaria rural.
Polo tanto, non é de estrañar que os temas destacados da novela sexan a familia, a educación, a amizade e o amor, tendo como fondo a descrición de fermosos paisaxes de Montana. Está moi ben escrito e traducido pero a historia resultou algo monótona para algunhas persoas do club pois "non pasaba nada". Só describe o pasar da vida, dun estilo de vida que xa nos queda moi lonxe na memoria pero ao que presta volver de cando en vez. A pesar diso foi unha lectura que a maioría das persoas gozou xa que deixa un bo sabor de boca.
O mércores 25 e xoves 26 de maio tiveron lugar as sesións do club de lectura. O libro a comentar era a obra de Diego Ameixeiras, "A crueldade de abril" publicado por Xerais. A dureza da historia e dos personaxes non deixaron indiferente a ninguén. Trátase dunha lectura áxil pero que deixa un pouso de desacougo no lector e fai que a súa "dixestión" sexa moi lenta e extremandamente ácida.
O vindeiro título a comentar no mes de xuño é "Unha temporada para silbar" de Ivan Doig publicada por Libros del Asteroide.
Esta semana, o mércores e xoves 27 e 28 de abril, tiveron lugar as reunións do club de lectura para comentar a obra de Philippe Claudel "Almas grises".
Por suposto houbo disparidade de opinións pero en xeral estivemos de acordo en que non se trata dunha novela negra e polo tanto se alguén vai con esas expectativas pode sentirse decepcionado como lle pasou a algún dos compañeiros do club. A escrita gustou ainda que os saltos temporais despistaron a máis de un. Os personaxes están ben descritos e a localización da historia, o seu entorno, moi preto dun campo de batalla en plena I Guerra mundial confórmase como un personaxe máis da novela.
É unha historia fascinante e perturbadora, onde a protagonista principal é a miseria humana, que por momentos chega a saturar, xa que non hai lugar para a esperanza.
Esta é a segunda obra do autor que lemos no club. A primeira foi "La nieta del señor Linh" que tamén deixou unha forte pegada na memoria dos integrantes do club.
As reunións de maio versarán sobre a lectura da obra de Diego Ameixeiras "A crueldade de abril" editado por Xerais.
A vinganza do defunto de Carlos G. Reigosa foi a novela da que se falou a semana pasada no club de lectura e como de costume houbo opinións diversas. Trátase da quinta entrega da serie de novelas iniciada por Crime en Compostela e protagonizadas polo detective Nivardo Castro e o xornalista Carlos Conde que resolverán un misterio do pasado con raíces no presente. Esta obra de intriga entretuvo a uns e desgustou a outros ainda que houbo unanimidade en canto a que nos descobre toda unha serie de feitos históricos de interese acontecidos en Galicia durante a II Guerra Mundial. Así coñecemos que no concello de Vila de Cruces houbo minas de volframio, as minas de Fontao, ou que Vigo e o seu porto convertíronse nunha vía de escape tanto para xudeus como para nazis.
O título que protagonizará a reunión do club de lectura de abril é Almas grises de Philippe Claudel.
A pasada semana, o mércores 23 e xoves 24 de febreiro, tivemos as reunións do club de lectura. A obra que comentamos foi "Volver a casa" da autora nada en Ghana e residente en Estados Unidos, Yaa Gyasi. . A narración desenvólvese na costa suroccidental de África, a actual República de Ghana, e en Norteamérica, abarcando desde o século XVIII ata o presente. As historias de Effia e Esi, fillas da mesma nai pero de pais de etnias diferentes, e que nunca se chegaran a coñecer, son as que inician o relato que non deixa de ser un percorrido alterno das dúas ramas familiares, e onde en cada capítulo preséntase a historia dun novo membro de cada un dos liñaxes.
Coa lectura seremos testemuñas do comercio de esclavos, das guerras tribais, do negocio do cacao, do papel dos misioneiros, da loita polos dereitos civís ou das drogas.
A súa lectura deixou unha fonda pegada en todos os participantes do club en parte pola estrutura utilizada pola autora, polo traballo histórico que hai detras ou por eses personaxes fortes que se rebelan e pouco a pouco vanse liberando dun destino planificado por outros. Un dos acertos sinalados por varios participantes foi que a autora non se recreou no drama e non plantexou unha historia de bos e malos.
O listón segue quedando alto de novo!
A próxima obra que comentaremos a finais do mes de marzo é A vinganza do defunto de Carlos G. Reigosa.
A finais do mes pasado (26 e 27 de xaneiro) volvémonos a reunir para comentar a lectura do libro Vestido de novia do autor francés Pierre Lemaitre. Atendendo á opinión case unánime dos participandes do club a súa lectura foi fácil e moi entretida. Trátase dunha novela negra onde o autor presenta unha trama intrigante e orixinal e utilizando uns recursos moi acertados, como por exemplo xiros inesperados na narración, consegue manter ao lector alerta e enganchado á historia ata a última páxina..
Como puntos fracos houbo quen sinalou un final un pouco precipitado así como o surrealista do relato nalgunhas ocasións.
En calquera caso deixou moi bo sabor de boca e o listón quedou alto para a seguinte lectura e comentario da obra:
Hai rutinas que se converten en cárceres e relacións tóxicas que cortan as ás de quen quixera voar, ou sinxelamente vivir ao seu xeito.
A violencia na relación sentimental é o eixe sobre o que xira a novela Formas de estar lejos de Edurne Portela publicada pola editorial Galaxia Gutenberg e que limos no mes de decembro. En maior ou menor medida, foi unha novela que nos gustou especialmente por como se trata un tema tan delicado como é o das relacións tóxicas. En relación a iso, Edurne Portela, demostra a visión das dúas partes, a do agresor e a da agredida. Revisita o concepto de "normalidade" e "naturalidade"; faltas de respeto que se desculpan por suceder en "momentos puntuais" e que "non se van volver a repetir" ata que se repiten e se intesifican.
Nunha relación onde hai ciumes, envexa, crueldade, é dicir, onde hai violencia, sexa física ou verbal, non hai nin amor nin respeto. Educar no feminismo tanto aos homes coma as mulleres é unha idea que está presente na novela. Alicia, a protagonista, é unha profesora universitaria, con estudos e con independencia económica, pero parece non ser autónoma para vivir soa.
De xeito secundario pero importante aparecen tamén outras denuncias como a violencia racista ou a herdanza e influencia das familias de procedencia.
Resumindo, estamos ante unha novela moi ben escrita cunha temática dura, real e necesaria. Esta obra forma parte do fondo da biblioteca.
A lectura para comentar os días 26 e 27 de xaneiro será Vestido de novia de Pierre Lemetre,
A novela de Pablo L. Orosa, Fálame do silencio foi a obra que comentamos este pasado mes de novembro. A complexidade da estrutura narrativa onde varias voces se cruzan e hai que ir encaixando cada peza coma se dun quebracabezas se tratara fixo que algúns dos membros do club non remataran a súa lectura. Esta novela de intriga e memoria na que os silencios marcan as vidas dos seus protagonistas require dunha lectura continua e concentrada. A historia lévanos pola Coruña da época da transición sen olvidar o tempo presente ou a época da ditadura pero non estamos ante unha novela histórica senon ante unha novela que reflexiona sobre a identidade e onde a emigración xoga tamén o seu papel na historia.
A próximo libro do que falaremos é Formas de estar lejos de Edurne Portela e as reunións serán antes do Nadal.
Esta tempada volvemos a vernos as caras no club de lectura...Por fin!. Para cumprir as medidas sanitarias e manter as distancias, tivemos que facer dous grupos polo que as reunións agora fanse o último mércores e xoves de cada mes.
 |
| Participantes na sesión do mércores |
Porén todos coincidimos en que se trataba dunha novela que tiña moitos fíos dos que tirar: a maternidade, os servizos sociais, a protección dos menores, os prexuizos, o maltrato e a enfermidade entre outros temas.
O humor é outra constante na historia o que xerou "sentimentos encontrados" ao tratar asuntos graves cunha dose moi grande de ironía e comicidade.
As reunións foron enriquecedoras ao aportar visións diferentes da lectura e foi moi grato para todos volver despois de tanto tempo á presencialidade.
O próximo libro sobre o que conversaremos no club os vindeiros 24 e 25 de novembro é Fálame do silencio do xornalista coruñés Pablo L. Orosa.
Voltamos de novo co club de lectura pero agora xa de forma presencial!. Debido ás distancias que hai que gardar imos desdobrar o grupo polo que faremos duas quendas: o último mércores e último xoves de mes. O título do libro que imos ler é "No somos los únicos que llevamos este estúpido apellido" da autora francesa Marie-Aude Murail. Esta temporada tamén se dou entrada a unha persona máis quedando equilibrados os dous grupos.
Como sempre desexamos que as reunións sexan o máis gratas posibles, compartindo lecturas e descubrindo puntos de vista diferentes.
